[KAN-Info] Komunikatë

[KAN Office]

KOMUNIKATË
 
 
Sipas informacioneve të deritanishme së paku rreth 15 qytetarë të
Kosovës janë vrarë në trazirat e dhunshme që kanë përfshirë vendin në 24
orët e fundit. Me qindra të tjerë janë të lënduar e të plagosur. Këto
trazira pasuan mbytjen në lumin Ibër të tre fëmijëve shqiptarë nga
fshati Çabër, të cilët u hodhën në lumë në ikje e sipër të ndjekur nga
serbët lokalë. 
 
Me këtë rast, ne aktivistët e Rrjetit të Aksionit për Kosovën (KAN), të
gjitha familjeve, më të dashurit e të cilave humbën jetën, u shprehim
keqardhjet dhe ngushëllimet tona të sinqerta. Urojmë që të lënduarit e
të plagosurit të shërohen sa më shpejtë. 
 
Nuk është hera e parë pas përfundimit të luftës, që qytetarët shqiptarë,
posaçërisht në veriun e Kosovës, por edhe qytetarë të tjerë të Kosovës,
vriten nga kriminelët. Kjo është mundësuar përderisa Kosova qeveriset
nga regjimi jodemokratik i UNMIK-ut. Tolerimi i strukturave paralele dhe
i shërbimeve sekrete të Serbisë, të cilat vetëm sa u bëjnë dëm edhe vet
serbëve të Kosovës, është bërë i padurueshëm. Qytetari i Kosovës është
ngulfatur nga pushteti i tepërt i UNMIK-ut dhe është dëshpëruar nga
pushteti kukull i institucioneve të Kosovës. Institucionet e Kosovës
janë ndërtuar dhe veprojnë në kuadrin e kornizave që nuk mbrojnë
interesat e qytetarëve dhe nuk përfaqësojnë vullnetin e tyre. Një sistem
i këtillë politik, duke mos ofruar shansë dhe zgjidhje institucionale e
demokratike, bëhet represiv dhe ai nuk mund të llogarit më në
lojalitetin e qytetarëve që nuk i respekton.       
 
Rrjedhimisht, ata që e kanë pushtetin (UNMIK-u) dhe ata që shtiren se e
kanë pushtetin (institucionet e Kosovës) janë përgjegjësit kryesorë për
ngjarjet tragjike dhe për gjendjen e rëndë në të cilën ndodhemi. 
 
Tejkalimi i kësaj situate dhe progresi i Kosovës në përgjithësi, para së
gjithash, varen nga respektimi i vullnetit të qytetarëve të Kosovës që
nënkupton edhe shtetin e pavarur dhe sovran të Kosovës. Moskuptimi ose
mospranimi i kësaj vetëm sa do ta thellojë krizën.   
 
 
 
Kosova Action Network (KAN)
 
Prishtinë, 17 mars 2004                                          
 
 
-------------- next part --------------
HTML attachment scrubbed and removed