[ALBSA-Info] Ne mbrojtje te nacionalizmit

[Kreshnik Bejko]

Falsifikuesit e "kombëtares" dhe kozmetika e "kozmopolitizmit". Çlirimtarët 
- "kombëtarët" dhe "kozmopolitët"

Nga Ernest Luma (Kosovapress)

----------------------------------------------------
  Nuk mund të jenë shqiptarët (të parët) ata që do të përfitojnë nga 
"koncepti i qytetarisë së përbotshme" në mishmashin nacionalist dhe 
ekstremist të Ballkanit. Kështu do të mund të flitej vetëm për gadishullin 
që ndodhet në polin e kundërt me të - Skaninavinë; sepse atje nuk ka Athinë, 
Beograd apo Shkup…, burime të pandërprera të nacionalizmit dhe urrejtjes mbi 
fqinjët.
-----------------------------------------------------

Prishtinë, 3 mars (Kosovapress) - Në mese dhe mediume të Kosovës ka individë 
e vizionarë që, përballë fenomeneve të reja në dhe rreth problemit të 
Kosovës apo shqiptarëve në përgjithësi, asnjëherë nuk kanë qenë ndonjë hap 
përpara mediave sikur që mund të jetë "Dnevni Telegraf" apo ndonjë simotër 
tjetër në Serbi. Ata edhe për Ushtrinë Çlirimtare të Kosovës (UÇK) dhe 
luftën heroike të saj, morën "izë" të flasin vetëm atëherë kur për të 
botoheshin reportazhe edhe në "Dnevni Telegraf" dhe telegrafë të tjerë të 
tillë.

Qarqe dhe mediume të tilla, vizionarë dhe "patriotë" të flaktë të 
fondacioneve dhe donacioneve të ndryshme, "kombëtare" e ndërkombëtare, kanë 
qenë ata që gjithmonë kanë menduar të promovojnë në Kosovë novacionet dhe 
ventilimet "demokratike" në Serbi, gjatë tërë dhjetëvjeçarit të fundit e, 
sidomos, tani pas "ndërrimit" të pushtetit në Beograd. Përfaqësues të 
qarqeve të tilla, njerëz nga të cilat në fillimin e të nëntëdhjetave - 
viteve që shënonin fundin e ish-RSFJ-së - bënë përpjekje e përpjekje për t'i 
zgjatur jetë dinosaurit të "vëllazërim-bashkimit", kohë më parë bënë edhe 
një hap gjigand përpara: Ekskluzivisht, vrapuan ta promovojnë Koshtunicën në 
opinionin kosovar dhe arritën ta bëjnë këtë me një sukses të madh. Qartë, 
pas kritikave, tentuan t'ia mveshin me vonesë edhe epitetet si "ujk" e diçka 
të ngjajshme…

Së fundi, i vunë nën thumbin e parodisë projektet çlirimtare të shqiptarëve. 
Nëse në fillim daljen në skenë të UÇPMB-së e kishin quajtur "imitim të dobët 
të UÇK-së", tani kanë filluar t'i parodizojnë vitet e sakrificës të 
shqiptarëve të përndjekur në ish-RFJ dhe idetë e tyre për një shtet unik 
shqiptar, me epitetet si "harta të vizatuara nëpër facueleta" dhe deri në 
"kartona të trashë të zbukuruar me ngjyra". "Kozmopolitët" e tillë kanë 
harruar se për harta të tilla, që ata i quajnë "faculeta", jo pak njerëz 
kishin ngrënë vite e dekada të tëra burg nga paraardhësit e Koshtunicës dhe 
konkretizuesit e projekteve për shfarosjen e shqiptarëve nga ASHA të 
Serbisë.

Jo vetëm kaq. Koncepti i "qytetarisë" që u dashka ta zëvendësojë atë të 
kombit, në mishmashet ballkanike, duket qartë se nga të tillë "qytetarë të 
të gjithë botës" ka tendencën e imponimit të pabazuar.

(Të gjithë e dinë se nuk është punë faculetash ideja serbomadhe dhe ajo për 
shfarosjen e shqiptarëve. Projektet e akademikëve serbë dhe veprat e 
nacionalshovenistëve si Ivo Andriqi, të cilit bota e qytetëruar ia ndau 
çmimin Nobel, nuk kishin së brendshmi kozmopolitizëm, por fund e krye ishin 
urrejtje ndaj shqiptarëve dhe sillnin porosi për shfarosjen e tyre. Bota e 
qytetëruar nderoi Andriqin, por jo edhe Kadarenë). Dhe kjo nuk është 
rastësi.

Nuk mund të jenë shqiptarët (të parët) ata që do të përfitojnë nga "koncepti 
i qytetarisë së përbotshme" në mishmashin nacionalist dhe ekstremist të 
Ballkanit. Kështu do të mund të flitej vetëm për gadishullin që ndodhet në 
polin e kundërt me të - Skaninavinë; sepse atje nuk ka Athinë, Beograd apo 
Shkup…, burime të pandërprera të nacionalizmit dhe urrejtjes mbi fqinjët.

Për "kozmopolitët" e bashkëkohësisë sonë janë të jashtëkohshme dhe të 
paqëlluara kërkesat për të qenë të lira të gjitha hapësirat e banuara me 
shqiptarë në rajon. Lufta çlirimtare e përtejlindjes së Kosovës (UÇPMB) dhe 
konflikti në përtejjugun e Kosovës (Maqedoni), më shumë se shqetësim, 
qarqeve prishtinase të "qytetarisë së përbotshme", u sjellin çaste komike. 
Komike për ta janë edhe vitet e tëra burg të shqiptarëve në ish-RFJ për 
"hartat e faculetave", sikurse që ishin dje edhe këmbënguljet për të mos e 
tjetërsuar flamurin tonë kombëtar dhe Hymnin.

Apostujt shqiptarë të "kozmopolitizmit" ballkanik, të mbështetur në vjeljen 
e fondeve dhe donacioneve të majme, nuk ngurruan të pohojnë se më mirë është 
që shqiptarët në Kosovë të kenë flamur e Hymn tjetër se sa të këmbëngulin 
për atë kombëtar; për ta ishte qesharake ideja se duhet luftuar për liri 
edhe shqiptarët përtej Lindjes së Kosovës; për ta është kontraverse që 
shqiptarët të luftojnë sot për liri edhe në Maqedoni - shtetin më të brishtë 
në Ballkan.

Kozmopolitët e Kosovës që nuk janë të tillë (tolerantë-liberalë) edhe 
ndërmjet vete dhe mund të ndodhë që edhe të grushtohen me njëri-tjetrin, kur 
është fjala për ndarjen (vjeljen) e sa më shumë fondeve (ndërkombëtare), 
marrin guximin të flasin dhe bëjnë pazarllëqe faqeve të gazetave me opcionet 
dhe përpjekjet e atyre që, tekefundit, sakrifikuan më së shumti për Kosovën 
dhe shqiptarët. Ata që dikur bënë burgun për Kosovën (në vitet më të mira të 
jetës), sot natyrisht se edhe do të luftojnë, sikur dje për Kosovën, ashtu 
edhe sot për Preshevën, Tanushecin, Tetovën, Dibrën…

Ndërkaq, "kozmopolitët" e fondeve dhe donacioneve ndërkombëtare, mund të 
kuptohet drejt se (edhe nëse nuk mendojnë ashtu sikur edhe flasin) të dalin 
kundër kryengritësve të Preshevës dhe Tanushecit dhe t'i quajnë shkarravina 
"faculetash" idealet e tyre, këtë janë të shtërnguar ta bëjnë, jo për hir të 
"kozmopolitizmit" më shumë se sa për hirë të kozmofondeve…

Membrana e përpjekjeve për realizimin e aspiratave kombëtare të shqiptarëve 
është duke u goditur në dy teha, dhe jo vetëm në botën e mediumeve:

Në njërën anë, goditet nga tehu i "kombëtarëve" që i abuzojnë deri në 
përbaltosje, me tendencën e përvetësimit të këtyre atributeve dhe 
tjetërsimit special të përpjekjeve dhe, në anën tjetër, goditet nga 
"kozmopolitizmi" që për fonde të majme është në gjendje të mohojë dhe 
periferizojë rëndësinë e çdo projekti që shkon në favor të shqiptarëve dhe 
që shprishë "gjeopolitikën" ndërkombëtare të donacioneve.

E vërteta e shqiptarëve në fundshekull po përpëlitet ndërmjet 
"kombëtarizmit" të falsifikuar dhe "kozmopolitizmit" të mveshur në 
kozmetikë.



(I njëjti artikull është botuar edhe në të përditshmen “Epoka e Re”)

_________________________________________________________________
Get your FREE download of MSN Explorer at http://explorer.msn.com