[ALBSA-Info] Gjin Zenebishi ne vend te Enverit

[Agron Alibali]

GAZETA E GJIROKASTRES

Busti, në vend të Enverit
do të vendoset Zenebishi

GJIROKASTER

Në vend të Enver Hoxhës do të vihet ish-sundimtari i
Gjirokastrës, Gjin Zenebishi. Ai do të vendoset te
vendi ku ka qenë busti i Enver Hoxhës, në krah të
majtë të rrugës kryesore, që të çon në sheshin e
Çerçizit, 300 metër larg tij. Lajmi është bërë i ditur
nga nënkryetari i Bashkisë së Gjirokastrës, Albert
Kasi.

Për këtë gjë, ka nisur edhe puna, me gjetjen e një
skeme të përafërt me figurën e Zenebishit, veshjen që
mund të jetë përdorur në ato kohëra dhe elementë të
tjerë. Sipas historianëve, familja e shquar e
Zenebishëve, ka jetuar në vitet 1305-1444, ndërkohë që
periudha e sundimit të Gjinit ka qenë në fillimet e
viteve 1400. "Do të jetë ky bust prezantimi i parë, që
qyteti do t'u bëjë vizitorëve përpara se ata të hyjnë
në zemër të tij", thotë Kasi. Dy muaj e gjysmë më parë
ka qenë skulptori i popullit Muntaz Dhrami, i cili ka
thënë se "Gjirokastra shumë shpejt do të ketë një
tjetër vepër monumentale, e cila do të jetë një
ndërthurje e figurave historike të këtij qyteti, të
atyre që e themeluan atë, të ndërthurur me
arkitekturën moderne". "Unë mendoj, tha atëherë
Dhrami, se ngritja e një vepre të tillë do të varet
edhe nga predispozicioni i qeveritarëve dhe hallkave
më të larta të qeverisjes vendore". 

Ngritja e bustit të Zenebishit do të jetë pjesë e një
projekti të Bashkisë së Gjirokastrës, i cili do të
zgjasë tri vjet, pra aq sa është dhe mandati qeverisës
i drejtuesve aktualë bashkiakë. Ky projekt, përpos të
tjerave, do të bëjë të mundur restaurimin e
monumenteve, busteve, basorelieveve, pllakave
përkujtimore të mjaft prej figurave të shquara që ka
pasur Gjirokastra në shekuj. "Qëllimi, sipas Kasit,
është që të bëhet restaurimi dhe ripërtëritja e këtyre
simboleve për t'i zbukuruar vetë ato dhe mjedisin
rreth tyre, edhe në kushtet e vështirësive për gjetjen
e fondeve". Brenda këtij projekti do të jetë edhe
emërtimi i një sërë lagjesh dhe rrugësh të qytetit,
por me emrat e njerëzve që i kanë dhënë aq shumë këtij
qyteti. 

Gazeta Shqiptare
 


__________________________________________________
Do You Yahoo!?
Get personalized email addresses from Yahoo! Mail - only $35 
a year!  http://personal.mail.yahoo.com/