[ALBSA-Info] Nga Kosova

[Agron Alibali]

Krimi i organizuar, shqetësimi më i madh për OKB-në


PRISHTINË - Lufta në Kosovë mund të ketë mbaruar, por
beteja për pushtet në provincë tani ka filluar të
ndizet. Rrjete të krimit të organizuar kanë drejtuar
sytë e tyre nga postet e pushtetit lokal. Kështu
pretendon administratori i OKB-së për Prishtinën.

"Këtu ekzistojnë probleme etnike që mund të zgjidhen
me kohë, por dhuna ekonomike është më e keqe", tha
Jean Guinard për AFP-në duke paralajmëruar se disa
individë që kanë futur para në xhep në Kosovën e
pasluftës, mund të fitojnë poste legjitime pas
zgjedhjeve lokale të 28 tetorit.

"Angazhimet e tyre politike janë vetëm një fasadë për
etjen e tyre për pushtet dhe për ambicie personale",
tha Guinard, i kujdesshëm të shtonte se, megjithatë,
shumë politikanë që kanë dalë nga lufta kundër forcave
jugosllave janë seriozisht të shqetësuar për fatin e
njerëzve të Kosovës.

Deri para pak kohësh, UNMIK dhe KFOR i kanë patur
duart plot pasi duhej të kontrollonin gjakderdhjen në
mes minoriteteve serbe, rome e mazhorancës kosovare
pas luftës.

"Krimi i organizuar akoma nuk është ndër prioritetet
tona", tha zëdhënësi i policisë së OKB-së për
Prishtinën, Charley Johnson, duke shpjeguar se deri
tani policia e OKB-së nuk i ka patur burimet apo
shërbimet sekrete për të filluar përgjimin e rrjeteve
të krimit në Kosovë.

Pavarësisht nga prania e rreth 46 mijë ushtarëve
ndërkombëtarë dhe policëve, rrjetet kriminele kanë
arritur të zhvillojnë aktivitetet e tyre si trafik
droge, armësh, prostitutash, nafte dhe cigaresh.

"Pas luftës këtu ka lulëzuar edhe mafia lokale",
shpjegon Johnson.

"Ne kemi sjellë disa nga ekspertët më të mirë të
Europës dhe ata po punojnë me 3 mijë oficerë të
policisë lokale që ne kemi trainuar për më pak se një
vit. Rrjetet e krimit të organizuar mund të mendojnë
se kanë patur terren të hapur për të vepruar, por
atyre po iu vjen fundi".

Në shtator, provinca u trondit nga sulmi që mafia i
bëri Rexhep Lucit, në Drejtorinë e Palnifikimit të
qytetit të Prishtinës, njeri i ndershëm që ishte
përpjekur "të fuste hundët" në ndërtimet ilegale të
qytetit.

Këtë javë, UNMIK sulmoi nga ana e saj, duke
sekuestruar tre ndërtesa të piketuara nga Luci për
shembje.

"Kjo është mënyra jonë për të treguar se ne nuk do e
lëmë këtë punë në mes. Ligji ka filluar të vendoset
tani dhe të gjithë do të jenë njëlloj para tij", tha
Guinard.

Administratorët lokalë të OKB-së do t'ia lëshojnë pak
nga pak pushtetin atyre që do të zgjidhen nga populli
në zgjedhjet e 28 tetorit.


__________________________________________________
Do You Yahoo!?
Yahoo! Photos - 35mm Quality Prints, Now Get 15 Free!
http://photos.yahoo.com/