[ALBSA-Info] SHEKULLI

[Agron Alibali]

Gazeta SHEKULLI
15 janar 2000

Kryetari i PD-së nis turin e takimeve në Jug. Sulmon
Qeverinë greke, por ndodh dhe e papritura
Berisha dështon në Gjirokastër
Kryetari i PD-së lokale: Mjaft me shpifje e
përjashtime
M. Duri 

GJIROKASTËR – Berisha nuk gjen mbështetje në degën
lokale të Partisë Demokratike të Gjirokastrës. I
ndodhur në një takim në sallën e teatrit të qytetit të
Gjirokastrës, Berisha është gjetur para një të
papriture. Kryetari i degës lokale, Roland Bejko, i
lindur në Lazarat, i ka kujtuar atij se në PD duhet të
marrin fund një herë e përgjithmonë përjashtimet,
pezullimet, apo shpifjet e armiqve. Bejko e ka hapur
fjalën e tij duke thënë se takime të tilla janë për të
dëgjuar njëri-tjetrin e për t'u marrë vesh, jo për t'u
çjerrë. "PD-në e morën në qafë komunistët që erdhën në
krye dhe që e shkelën demokracinë e brendshme. Kështu,
më 1996, njerëzit e qendrës deklaronin në konferencën
e degës se zoti X do të zgjidhet kryetar edhe dy vota
sikur të marrë, po këta persona më 1997 lanë
institucionet në dorën e rebelëve",- u shpreh kreu i
PD-së lokale në Gjirokastër. Bejko e ka mbyllur fjalën
e tij me shprehjen "të mos harrojmë se më 1997 PD-në e
ringriti Azem Hajdari e Genc Pollo. PD duhet të jetë e
bashkuar dhe të mos përjashtojë e pezullojë njeri".
Ndërkohë, Berisha, në fjalën e tij ka dalë në mbrojtje
të emigrantëve shqiptarë që punojnë e jetojnë në
Greqi, si dhe të minoritarëve grekë në vendin tonë, në
tubimin e organizuar nga dega lokale e PD-së, me
rastin e 9-vjetorit të themelimit të saj. Berisha ka
qenë tepër i ashpër me Qeverinë greke, e cila, sipas
tij "po shfrytëzon egërisht shqiptarët që punojnë e
jetojnë në Greqi." "Ne kemi nënshkruar marrëveshje me
qeveritarët grekë për emigrantët shqiptarë, por ajo
nuk po i trajton ata si faktorë miqësie mes dy vendeve
e dy popujve tanë, nga më të vjetrit në Ballkan. Ne
kërkojmë që Qeveria greke t'u jetë mirënjohëse
shqiptarëve, pasi ata po kontribuojnë për zhvillimin e
Greqisë me punën e tyre. Në qoftë se bujqësia greke
rritet çdo vit me 10-12 për qind, këtu kanë meritë
edhe emigrantët shqiptarë; bankat greke lëvrojnë me
paratë e shqiptarëve, shumë mallra greke hyjnë në
Shqipëri prej tregtarëve tanë e grekë, pra është një
çështje madhore kjo dhe ne duhet të mësohemi të bëjmë
llogaritë, pasi miqësia është miqësi, por dhe hesapet
janë hesape. Dhe ne nuk do të lejojmë që shqiptarët të
keqtrajtohen",- u shpreh lideri i PD-së. Lidhur me
procedurat e reja të vizave Berisha tha se "ato duhet
të merren në kufi dhe, t'i jepet fund diskriminimit të
shqiptarëve." 
Kreu i PD-së u ndal më pas tek problemet e emigrantëve
tanë në Greqi, të cilët "nuk mund të mësojnë fëmijët
në gjuhën amtare, ndërkohë që në Gjirokastër
minoritarët kanë edhe universitet në gjuhën e tyre."
Këtu Berisha gjeti rast e kritikoi Kryeministrin Meta
dhe stafin e tij në vizitat e para pak ditëve në Jug
të vendit. "Minoritarët nuk kanë nevojë për premtimet
e Metës. Ata nuk kanë nevojë t'u hedhë Meta gunën
krahëve. Minoritarët duan të jetojnë në vendin e tyre
e jo në Greqi, të kenë infrastrukturën e tyre
bashkëkohore, të ndërtojnë mirëqenien e vet në krahinë
e jo të marrin arratinë në kurbet. "Qeveritarët
tanë,-tha më poshtë Berisha,- janë më të korruptuarit
në botë. Mafia shqiptaro-greke është në lulëzim, por
ne dot të ngrihemi e do t'i përmbysim, me votën e
lirë, në zgjedhjet e reja. Natyrisht, ne nuk duam
sherre me komshinjtë, por secili është zot në shtëpinë
e vet. Qarqe të caktuara greke,- tha kreu i PD-së,-
janë të interesuara për politika destabilizuese, por
ne, me të marrë pushtetin, do t'i presim këto fije."
Sipas Berishës, zgjedhjet janë një domosdoshmëri, pasi
"korrupsioni po grryen shpirtin dhe zemrën e
shqiptarëve dhe se ato janë rruga e vetme e sigurtë
për të ndërprerë krizën e përgjithshme qeverisëse, çka
po shohim përditë. Shqipërinë e hapëm ne drejt
Evropën, drejt Perëndimit, pluralizmin e sollëm ne,
demokratët. Ajo është vepra jonë e ne jemi në këmbë:
Besimi juaj tek alternativat tona është i madh, në
rritje dhe unë besoj e shpresoj se zgjedhjet do t'i
japin Shqipërisë ndërprerjen e krizës dhe popullit
mirëqenien e merituar."
Në këtë takim kryetari i PD-së shoqërohej nga
nënkryetarja e Parlamentit, Jozefina Topalli,
Sekretari i Përgjithshëm i PD-së, Ridvan Bode,
sekretari i degës së Tiranës, Shaban Memia, anëtarët e
kryesisë, Uran Butka e Fatos Beja ejt. 


__________________________________________________
Do You Yahoo!?
Talk to your friends online with Yahoo! Messenger.
http://im.yahoo.com