[ALBSA-Info] Shekulli

[Agron Alibali]

Çabej, Kokalari dhe Kadare, qytetarë nderi në
vendlindje
Gjirokastra nderon të mëdhenjtë e saj
Olimbi Velaj

Eqrem Çabej, Musine Kokalari dhe Ismail Kadare bëhen
qytetarë nderi në vendlindje. Do të jetë 14 shkurti
dita e kurorëzimit të tre gjirokastritëve të mëdhenj
me titullin "Qytetar nderi i Gjirokastrës". Kryetari i
Bashkisë së Gjirokastrës, Ylli Asllani, tha dje për
"Shekullin" se ceremonia e dhënies së këtyre titujve
njerëzve më të shquar të qytetit do të ketë përmasat e
një feste dhe se jo rastësisht është zgjedhur dita e
14 shkurtit për mbajtjen e saj. Kryebashkiaku tregoi
se vitet e fundit shumë qytetarë gjirokastritë dhe
intelektualë të qytetit kanë propozuar disa herë për
dhënien e titullit "Qytetar nderi" këtyre tre
personaliteteve, por vetëm tani erdhi çasti. Asllani
tregoi hollësi për aktivitetin, duke përmendur se ai
është ideuar nga vetë intelektualët gjirokastritë.
"Nuk do të jetë thjesht një ceremoni ku këto
personalitete do të vlerësohen. Në këtë aktivitet ne
do të shpalosim disa nga projektet tona kulturore që
lidhen me qytetin dhe traditën e tij, thotë
kryebashkiaku, i cili përmend se për Gjirokastrën po
hartohet një enciklopedi, gjë jo fort e zakonshme kjo
për qytetet shqiptare. Ndërsa do të shpalosen edhe
projektet që ka pushteti lokal për rimëkëmbjen e
vlerave muzeale dhe monumentale të qytetit. Kryetari i
Bashkisë theksoi se të gjitha shpenzimet e aktivitetit
do të përballohen nga Bashkia dhe se me këtë aktivitet
i hapet rruga një serie aktivitetesh të tjera
kulturore që lidhen kryesisht me figurat më të shquara
që ka nxjerrë ky qytet. Për Musine Kokalarin pas pak
javësh do të mbahet edhe një simpozium kushtuar jetës
dhe veprës së saj, tha kryebashkiaku i Gjirokastrës.
Ndërsa Bujar Hudhri, drejtori i shtëpisë botuese
"Onufri", tha se në aktivitetin që do të mbahet në
Gjirokastër kjo shtëpi botuese do të bëjë një
paraqitje të veprës së Kadaresë. Afishe me ballinat e
librave të fundit të Kadaresë dhe një minipanair i
veprave të tij, po edhe të Çabejt e Kokalarit, do të
jenë të pranishme në vendin ku do të mbahet
aktiviteti. Gjithashtu botues, studjues dhe njerëz të
letrave nga Tirana dhe qytete të tjera janë ftuar të
marrin pjesë në këtë aktivitet. 
Dhënia e titujve "Qytetar nderi" tre personaliteteve
të jetës shqiptare, Çabejt, Kokalarit dhe Kadaresë
është konceptuar thuajse tërësisht si një spektakël.
Këngët popullore, dekori me tri harqe dhe stema e
qytetit në sfond do të jenë të pranishme në kohën që
aktorët gjirokastritë do të interpretojnë pjesë të
zgjedhura nga veprat e tre të mëdhenjve gjirokastritë.
Pjesën qendrore në interpretim e zënë pasazhe nga
vepra e Kadaresë. Do të përurohet me këtë rast një
bareliev në qendër të qytetit ku paraqiten të tria
këto figura, ndërsa do të zbulohet përmendorja e Eqrem
Çabejt përpara Universitetit të Gjirokastrës, që mban
emrin e tij.

__________________________________________________
Do You Yahoo!?
Talk to your friends online with Yahoo! Messenger.
http://im.yahoo.com