[ALBSA-Info] Shqiperia nis shkaterrimin e armeve te vogla

[Kreshnik Bejko]

Filloi zbatimi i Memorandumit Shqipëri, SHBA, Gjermani, Norvegji për 
shkatërrimin e armëve të vogla e të lehta

Filloi zbatimi i Memorandumit, për asgjësimin e armëve të vogla e të lehta 
të grumbulluara pas ngjarjeve të ’97 si dhe i atyre që disponohen mbi 
nevojat organike të Forcave tona të Armatosura, i nënshkruar në Shtator 
2000, midis Shqipërisë, SHBA, Gjermanisë dhe Norvegjisë.

Në Bazën e Furnizimit të Ushtrisë në Mengël të Elbasanit, ku është instaluar 
impianti i asgjësimit të armëve, filloi sot, faza e parë e realizimit të 
këtij angazhimi të përbashkët, në kuadrin e Tryezës së Tretë  të Paktit të 
Stabilitetit. Ishin të pranishëm Zv. Ministri i Mbrojtjes, z. Marko Bello, 
Zv. Ambasadori i Republikës Gjermane në vendin tonë z. Peter Blomeyer, 
përfaqësues ushtarakë nga të dy vendet dhe media e ftuar.

Faza e parë, e cila përfshin asgjësimin e 40.000 armëve të grumbulluara, do 
të realizohet për 4 muaj, me mundësimin logjistik të Ushtrisë Gjermane, 
trainimin e personelit dhe asistencën e një ekipi  prej 5-së ushtarakësh 
gjermanë.

Zv. Ministri i Mbrojtjes Marko Bello falenderoi në emër të Qeverisë Qeverinë 
Gjermane për këtë mbështetje dhe shprehu sigurinë e vijimit të këtij 
angazhimi edhe nga dy shtetet e tjera nënshkruese, deri në asgjësimin e 
plotë të 130.000 armëve që parashikon Memorandumi.

Duke u shprehur se se ky aksion do të vazhdojë deri në asgjësimin e plotë të 
të gjitha armëve që janë mbledhur apo do të mblidhen nga popullsia civile si 
dhe të gjithë atyre që disponohen mbi nevojat organike të Forcave tona të 
Armatosura, zoti Bello tha se: - “Ne sot, demostrojmë fillimin e një hapi 
konkret i cili është tregues i kujdesit të Qeverisë Shqiptare për sigurinë, 
paqen dhe stabilitetin në Ballkan”.

Zv.Ambasadori gjerman Blomeyer e përshëndeti këtë veprim në kuadrin e Paktit 
të Stabiliteti, si një shëmbull për të gjithë vendet e Evropës Juglindore. 
“Shqipëria, - tha diplomati gjerman, - hapi sot një faqe për demilitarizimin 
e Ballkanit”.

Në vazhdim për të pranishmit u demostrua asgjësimi i disa prej llojeve të 
armëve të magazinuara në Bazën e Mengëlit. Komandanti i kësaj Baze Kol. 
Albert Bora deklaroi për të pranishmit se: - “Brenda 30 ditëve do të 
asgjësohen të 8.500 armët e grumbulluara këtu nga popullata. Para 
asgjësimit, secila armë, - tha kol. Bora, - do t`i nënështrohet kontrollit 
për municion dhe do të regjistrohet në evidenca të rregullta në mënyrë që 
asnjë pjesë e saj të mos humbasë për t`u bërë e rrezikshme për më vonë.


_________________________________________________________________
Get your FREE download of MSN Explorer at http://explorer.msn.com