[ALBSA-Info] Per Ligjin e Luftes

[Agron Alibali]

SHEKULLI
22 Gusht 2000


Gjendja e Luftës me Greqinë mund të zgjidhet në
kuadrin dypalësh
Flet zëdhënësi i Ministrisë së Jashtme, Sokol Gjoka:
Nëse s'japin rezultat bisedimet, do të shikohen
mundësi të tjera
Ylli Molla

“Tani për tani Ministria e Jashtme nuk e shikon të
nevojshme ndihmën e Shteteve të Bashkuara të Amerikës
dhe të Komunitetit Evropian për heqjen e ligjit të
gjendjes së luftës nga Qeveria e Athinës. Mendojmë se
ky problem mund të zgjidhet me bisedime dypalëshe”, -
u shpreh dje për "Shekulli"-n zëdhënësi i kësaj
ministrie, Sokol Gjoka.
Cilat janë iniciativat që ka ndërmarrë Ministria e
Jashtme, pas vitit 1997, për të arritur heqjen e
Ligjit të Gjendjes së Luftës nga Qeveria Greke, i cili
vepron prej vitit 1940?
Ligji i Luftës është trajtuar më se njëherë nga
Qeveria Shqiptare me partnerët grekë. Është trajtuar,
sepse është në kundërsens me zhvillimin e
marrëdhënieve midis dy vendeve tona. Ndërkohë që kemi
një Traktat të Miqësisë dhe Bashkëpunimit, kemi edhe
një ligj lufte midis dy vendeve. Kështuqë, rastet janë
të shumta, ku ky ligj është trajtuar nga Qeveria
Shqiptare, si në takimet bilaterale, por edhe në ato
shumëpalëshe. Si rastin e fundit mund të përmend edhe
takimin e ministrave të Jashtëm të vendeve të Evropës
Juglindore në Ohër, ku ministri i Jashtëm shqiptar iu
drejtua homologut të tij grek për këtë problem, duke
ia përmendur përsëri, që të shikohet mundësia e heqjes
së Ligjit të Luftës, mbasi nuk i përshtatet realitetit
të marrëdhënieve dypalëshe. Pra interesimi nga pala
shqiptare është, ky interesim ka qenë gjatë gjithë
kësaj periudhe dhe, natyrisht, edhe nga pala greke,
kam përshtypjen që është marrë në konsideratë. Fakti
që ky ligj ekziston dhe nuk është hequr, i takon palës
greke të reagojë. Por kjo nuk do të thotë që Qeveria
Shqiptare të mos vazhdojë insistimin e vet, brenda
kuadrit të marrëdhënieve dypalëshe, sepse shikon
mundësira që brenda kuadrit të këtyre marrëdhënieve të
realizohet heqja e Ligjit të Luftës. 
Cilat janë argumentet që ka ngritur pala greke, në
mbrojtje të ligjit të luftës, gjatë takimeve zyrtare
me palën shqiptare?
Duhet ditur procedura për heqjen e Ligjit të Gjendjes
së Luftës. Kjo procedurë i takon Parlamentit Grek, i
cili ka të drejtë të marrë vendimin përfundimtar.
Qeveria Greke, si çdo qeveri tjetër në këtë kuadër, ia
përcjell këtë shqetësim Parlamentit Grek. Dhe para pak
vitesh Parlamenti Grek e ka diskutuar këtë problem,
por nuk arriti ta kalonte me shumicë votash heqjen e
Ligjit të Luftës. Kështuqë, Qeveria Greke, në këtë
mes, natyrisht që përpilon strategjinë e vet dhe ia
paraqet atë Parlamentit Grek. Kam përshtypjen që
Qeveria Greke, në kushtet e marrëdhënieve intensive
dypalëshe, nuk ka asnjë interes që ta mbajë ende
Ligjin e Luftës. Kështuqë, edhe për Greqinë në
vetvete, mendoj që është periudha më e mirë që ta
rishqyrtojë. 
A keni kuptuar gjatë takimeve zyrtare se një nga
shkaqet që e zvarrit këtë ligj është detyrimi që ka
Qeveria Greke ndaj pronave të shqiptarëve?
Edhe mundet që të ketë të bëjë me këtë problem. Një
nga arsyet mund të jetë edhe problemi i pronave. 
A ka kërkuar Ministria e Jashtme ndihmën e SHBA dhe të
Komunitetit Evropian që të ushtrojnë presion mbi
Qeverinë Greke për heqjen e Gjendjes së Luftës me
Shqipërinë?
Jo. Ne kemi mendimin që ky problem, hë për hë, në
kushtet e zhvillimit të marrëdhënieve dypalëshe, mund
të zgjidhet edhe në kuadrin bilateral. 
Atëherë kur mund të ndodhë kjo?
Ne nuk mund të japim data ekzakte, sepse nuk varet nga
ne. Çështja është te problematika që ekziston, e cila
për një farë periudhe mbase ka qenë edhe tabu. Ju
mbase e mbani mend, Kryeministri Meta, me marrjen e
detyrës së tij, në vizitën e parë që bëri në Greqi,
pas një pyetjeje të medias greke për problemin çam, ai
u përgjigj hapur dhe drejtëpërdrejtë. Pra kurajoja e
Qeverisë Shqiptare në këtë drejtim nuk është se nuk
ekziston. 
A ka ndonjë strategji Ministria e Jashtme për hapat që
duhet të hedhë në të ardhmen deri në realizimin e
objektivit përfundimtar për heqjen e gjendje së
luftës?
Ashtu siç e thashë edhe më lart, ne shpresojmë që
nëpërmjet kontakteve të vazhdueshme, nëpërmjet
ngritjes së kësaj çështjeje, herëpashere dhe në kuadër
të klimës së marrëdhënieve që ekzistojnë midis dy
vendeve, të imponohemi për heqjen e Gjendjes së
Luftës. Pastaj, nëqoftëse këto nuk kanë rezultat,
natyrisht që do të shikohen mundësi të tjera 
 


__________________________________________________
Do You Yahoo!?
Yahoo! Mail – Free email you can access from anywhere!
http://mail.yahoo.com/