[ALBSA-Info] Vetëelegji në tri akte e një ushtari të vrarë të UÇK-së

[Uk Lushi]

Vetëelegji në tri akte e një ushtari të vrarë të UÇK-së

Akti I

Paska ardhur pranvera

shqiptarë
kahdo që jeni-

mos qani

mos qani për mua

unë isha ushtari i UÇK-së

ju desha të gjithëve
dhe shpresoj se edhe ju me deshët

nuk kam të them më shumë

dheu ma ka mbuluar trupin
qiellin se shoh
dielli a mos ka renë në oqean

mollët a kanë luluar
nëna a i ka blerë syzet
shelgjet a janë thyer në piptha

ah pranvera paska ardhur



Akti II

Paska ardhur pranvera

ballkanas
kahdo që jeni-

mos qani

mos qani për mua

unë isha ushtari i UÇK-së

ju desha të gjithëve
dhe shpresoj se edhe ju do të më doni

nuk kam të them më shumë

ende e ndiej
nxehtesinë e plumbit që më përshkoi zemrën

hapeni varrin tim
hiqmani këtë dhe mbi trup
qiellin ta shoh
diellin tek ngritet në horizont
vajzën që e lashë shtatzanë
djalin tim në paqe

ah pranvera paska ardhur



Akti III

Paska ardhur pranvera

njerëz
kahdo që jeni-

mos qani

mos qani për mua

unë isha ushtari i UÇK-së

ju desha të gjithëve
dhe shpresoj se edhe ju do të më doni

nuk kam të them më shumë

unë nuk do të ngritem kurrë
unë nuk do të kthehem kurrë

ju lutem

hapini zemrat me çelësin e gjakut tim
dhe humbeni atë çelës
që kurrë t' mos mund ti mbyllni më

ju flas unë
ushtari i UÇK-së nga një varr masiv

ju lutem
ma ndizni një qiri mbi këtë varr
ta shoh dritën
në fundin e tunelit që s' arrita ta shoh përsgjalli

unë nuk nuk munda ndryshe
mu desht ta zgjedh lirinë

ju lutem
unë nuk kam të them më shumë

ah pranvera paska ardhur




Uk Lushi
________________________________________________________________________
Get Your Private, Free E-mail from MSN Hotmail at http://www.hotmail.com