[Alb-Islam] Kumtesa: "Ramazani ne Kosove," Dr. Rexhep Boja

[Mentor Cana]

Vëllezër të dashur!

Nesër, më 9 dhjetor, është dita e parë e muajit të Ramazanit. Ky është
Ramazani ynë i parë në Kosovën e lirë. Deshi Allahu i madhërishëm me fuqinë
e Tij e na plotësoi një lutje tonë të kahmotshme që Kosova jonë të jetë e
lirë.
Mirëpo, çmimi i kësaj lirie ishte tejet i shtrenjtë. Prandaj, me këtë rast
kemi obligim fetar dhe kombëtar t’i përkujtojmë mbi 15.000 viktima të
pafajshme e të pambrojtura, të cilët u flijuan për lirinë e Kosovës dhe mbi
7000 të zhdukur e po aq të burgosur të cilët po mbahen peng në burgjet e
Serbisë.
Prandaj, kemi obligim që të gjithë ne të kemi respekt për sakrificat e tyre
dhe të lutemi për ta, ndërsa me të afërmit e tyre të solidarizohemi që së
paku t’ua lehtësojmë dhembjet që ata kanë për më të dashurit e tyre. Por,
respektimi më i madh që ne do të bënim për ta do të ishte që ne t’i
realizojmë idealet e tyre për të cilën ata sakrifikuan edhe jetën e tyre e
ajo është që në Kosovën tonë të lirë të mbretërojë qetësia, paqa dhe
siguria. Vetëm nëse e realizojmë këtë, atëherë ne do të çojmë në vend
amanetin e tyre.
Agjërimi, si njëri prej pesë shtyllave të Islamit, për besimtarin është
simbol i sakrificës, prehjes shpirtërore dhe solidaritet në kuptimin më të
thellë të fjalës. Një solidaritet të tillë ndaj nesh më së miri e treguan në
praktikë vëllezërit tanë në Maqedoni, Shqipëri e Mal të Zi, duke i strehuar
vëllezërit e tyre në kulminacionin e fushatës më të egër të dëbimeve nga
soldateska serbe.
Këtu nuk duhet të harrojmë dhe solidaritetin dhe ndihmën e adhe që na ofroi
edhe Bashkësia e gjerë ndërkombëtare, qoftë në strehim apo sigurimin e
rikthimit tonë në Kosovë, si dhe përpjekjet e saj për vendosjen e rendit dhe
stabilizimin e gjendjes në të.
Agjërimi nuk do të thotë që besimtari të mos hajë e të mos pijë për një kohë
të caktuar, por para së gjithash, ai lypset ta ndalojë vetveten prej punëve
të këqija. Vendosja e rendit, qetësisë dhe paqes në Kosovë, nuk është
obligim vetëm i forcave të KFORit, policisë ndërkombëtare të UNMIKut ose e
TMKsë, por ai është obligim i çdo qytetari të Kosovës. Imazhin, të cilin
populli i Kosovës e arriti në botë me aq sakrifica, nuk duhet të lejojmë që
ta prishin disa kriminelë ordinarë, hajdutë e plaçkitës nën çfarëdo
maske qofshin ata. Në Kosovën e lirë më nuk duhet të ketë vend për
hakmarrje, djegie e vrasje të njerëzve të pafajshëm vetëm pse ata i përkasin
një feje apo kombi tjetër apo flasin një gjuhë tjetër. Fajësisë kolektive në
Kosovë duhet thënë stop njëherë e përgjithmonë.
Njerëzit nuk duhet të gjykohen mbi këtë bazë, por në bazë të veprimeve të
tyre dhe se këtë duhet ta bëjnë organet e ndjekjes dhe të drejtësisë.
Apelojmë tek besimtarët tanë që për hirë të Ramazanit, në Kosovë të
mbretërojë qetësia, rendi dhe paqa, që njerëzit të jenë të lirë t’i kryejnë
punët e tyre, që ata të mos brengosen për fëmijët e tyre. Vetëm, nëse
kthehet rendi e qetësia do të jemi të denjë ta quajmë veten popull i lirë
dhe në atdheun e lirë. Secili prej nesh ka përgjegjësi për (mos)veprimet e
veta, andaj mos të lejojmë që tash të dështojmë para Allahut, pastaj edhe të
mos i dëshpërojmë miqtë tanë të cilët në momentet më të vështira na ofruan
ndihmë, sepse “Allahu nuk e ndryshon gjendjen e një populli pa mos e
ndryshuar ai vetveten”.
Të nderuar vëllezër dhe motra! Allahu i Gjithëmëshirshëm na urdhëron: “Dhe
kapuni që të gjithë për fenë e Allahut e mos u përçani në mes veti...” (Kur’
ani) Është ky një urdhër i paalter nativë për unitet e urtësi, prandaj
ftojmë të gjithë njerëzit e vullnetit të mirë, e në veçanti prijatarët
politikë, që të gjejnë kurajë e gatishmëri, e të jenë sa më unikë. Vetëm me
unitet, harmoni dhe respekt të ndërsjellë, do ta jetësojmë idealin e
shehidve tanë  pavarësinë e Kosovës.
Edhe në këto momente, kur e tërë bota jeton me kënaqësitë e muajit të
Ramazanit, me dhuntitë e pakufishme të tij, zemrat tona janë të plagosura
për Mitrovicën përkohësisht të ndarë, për Preshevën, Bujanocin e Medvegjën,
e sidomos për të burgosurit tanë që dergjen nëpër kazamatet e Serbisë.
Duke ju uruar për muajin e madhërishëm të Ramazanit, lusim Allahun e
Gjithëmëshirshëm që lutjet dhe ibadetin tonë të na i pranojë.

Kryetari:
Myftiu, dr. Rexhep Boja