[AlbClub] Mos të fshihen ushtarakët, pas ministrit

[Bashkim Kopliku--->Gmail Home]

Mos të fshihen ushtarakët, pas ministrit
[Gazeta Shqiptare, 7.5.2008]

Ministri i mbrojtjes ka përgjegjësi për udhëheqjen e keqe politike të 
ministrisë së mbrojtjes, sepse e degjeneroi në atë masë aparatin ushtarak 
shqiptar, saqë ndodhi Gërdeci.  Por nuk mund të bëhet ai fajtor direkt as 
për zgjedhjen e Gërdecit, as për moskontrollet e kryerjes së punës në 
fabrikë, as për mos mbikëqyrjen teknike (ushtarake) të të gjithë procesit. 
Që shpërtheu Gërdeci, shkaku direkt është moszbatimi i normave e standardeve 
ushtarake, për të cilat mbajnë përgjegjësi direkte specialistët, ushtarakët, 
dhe jo ministri, i cili nuk duhet të sillet si specialist.  Për rrjedhojë, 
prokuroria nuk mund t'i japë ministrit Mediu përgjegjësi teknike ushtarake. 
Duhet që administrata jonë të zbatojë rregullat teknike, pavarësisht se ç'urdhra 
merr nga politika.  Po nuk dhamë kësaj here fort këtë mesazh, nuk ka asnjë 
garanci se nuk do të kemi prapë një Gërdec tjetër.

Me Gërdecin pleksen shumë probleme.  Por njëri është kryesori: eksplozioni 
(shpërthimi) që ngjau, ku humbën jetë dhe u plagosën me qindra njerëz, ku u 
shkatërrua gjithë ajo pasuri.  Shkaku kryesor i eksplozionit, është 
mosmarrja e masave teknike ushtarake.  Problemet si korrupsioni, nuk duhet 
të errësojnë problemin kryesor.  Nuk duhet që marrja pas korrupsionit të 
heqë vëmendjen nga përgjegjësia politike për eksplozionin, si dhe 
përgjegjësia teknike ushtarake.  Të përqendrohesh tek korrupsioni, është 
mënyra më e mirë që të mbrosh fajtorët kryesorë: politikanët dhe ushtarakët. 
Nuk është Gërdeci, një problem si mijëra të tjerë, thjesht punë ryshfetesh 
me tendera, evazione fiskale etj., me të cilat është mbushur Shqipëria.

Z. Mediu, ish-ministri i mbrojtjes, bëri mirë që dha dorëheqjen, sepse 
katastrofa që ngjau, ishte në ministrinë e tij, dhe ai ka përgjegjësi 
direkte, për mos zbatimin e një politike kuadri që sjellë në krye të punëve 
ushtarakët më të aftë, apo që ka lejuar një frymë moszbatimi të ligjeve dhe 
rregullave ushtarake etj.  Vertikalisht mbi z. Mediu, kanë përgjegjësi 
politike, në radhë të parë kryeministri, e në radhë të dytë presidenti, e në 
radhë të tretë edhe kryetarja e Kuvendit.  E thënë më përmbledhtas, kanë 
përgjegjësi politike të gjithë ata që i dëgjuam t'i japin vetes merita për 
marrjen e ftesës për në NATO: e pra, meritat janë të pandara nga 
përgjegjësitë.

Por nuk ka asnjë përgjegjësi direkte z. Mediu, për probleme teknike 
ushtarake, sepse ministri i mbrojtjes, as tek ne, po as edhe në ndonjë vend 
tjetër demokratik, nuk ka sepse të merret me çështjet teknike, edhe po të 
merrte vesh nga problemet teknike të ushtrisë.  Bile edhe nëse ministri do 
të ishte ushtaraku më i zoti i Shqipërisë, ai duhet prapë se prapë problemet 
ushtarake t'ua lërë t'i zgjidhin strukturat ushtarake të ushtrisë: shefi i 
shtabit, gjeneralët, kolonelët e deri tek ushtarët.  Ndaja e pushtetit 
politik, nga ai ushtarak, është i qëllimshme në demokraci.  Vetëm 
diktatorët, si Stalini dhe Hitleri, përqendronin çdo gjë në duart e veta, 
ani se as nuk ishin specialistë ushtarakë, e nuk kishin as përgatitjen 
minimale për këtë punë.   Nejse, nuk po zgjatemi këtu në principet e ndarjes 
së pushteteve në ministri.

Heqja e imunitetit të z. Mediu, është krejt normale: duhet të hetohet se mos 
përgjegjësia politike ka arritur deri në një vepër penale, e mbase ka edhe 
elementë korrupsioni që janë bërë objekt diskutimi publik-por mbase 
korrupsioni është dhe si diversion për të harruar përgjegjësinë politike, që 
është kryesorja.

Ajo që është krejt jonormale, është mosmarrja në përgjegjësi penale e 
ushtarakëve në linjën e kontrollit të zbatimit të rregullave të trajtimit të 
municioneve, e mbikëqyrjes dhe inspektimit të procesit të fabrikës së 
Gërdecit, të ruajtjes së vendit nga rreziqet (zgjedhja idiote e manipulimit 
me sasi të mëdha municioni mu në mes të Shqipërisë) etj.  Këto të gjitha 
janë detyra teknike ushtarake.

Ushtarakët e strukturave të Ministrisë së mbrojtjes, kanë përgjegjësi 
direkte për moskryerjen e detyrës.  Edhe nëse "ministri nuk i ka pyetur", 
kjo nuk i justifikon fare që nuk kanë kryer detyrën e tyre.  Ushtaraku e di 
detyrën e vet, dhe duhet ta kryejë, edhe nëse "ministrit i ka luajtur 
 mendja".  Ushtaraku e di që ministri është person politik, jo specialist i 
ushtrisë, prandaj është detyrë dhe përgjegjësi direkte e ushtarakëve, 
kryerja prej tyre e detyrave teknike ushtarake, dhe mos lejimi që për to të 
mos pyeten ata.  Pra, edhe sikur asnjë shkresë e transaksioneve tregtare të 
mos u ketë vajtur ushtarakëve-gjë që është krejt e pamundur-prapë se prapë, 
përgjegjësia e tyre ushtarake nuk shmanget: edhe pa "shkresa për Gërdecin", 
ata e dinin se nga magazinat e tyre merreshin municione, dhe duhet t'i 
ndiqnin ato.

Nëse do të justifikohen ushtarakët për moskryerjen e detyrave të tyre, me 
"na urdhëroi ministri", kemi legjitimuar servilizmin në ushtri, kemi 
legjitimuar zbatimin e urdhrave të kundërligjshëm, zbatimin e urdhrave në 
kundërshtim me logjikën teknike dhe morale, që është tipike e regjimeve 
diktatoriale.  Jo, ushtarakët duhet të zbatojnë jo "urdhrat e politikës" për 
çështjet teknike ushtarake, por ligjin dhe rregullat e zanatit të tyre.

Ushtarakët duhet të dënohen për Gërdecin, jo vetëm për fajin e tyre, por 
edhe për të dhënë mesazhin për të tjerët, për ushtarakët që do t'i pasojnë, 
se nuk mund të justifikohen për mosveprimet apo veprimet e tyre, nga trysnia 
e politikës.  Duhet të ngulisim në ushtri, si dhe në dikasteret e tjera, që 
nëpunësi i shtetit, ushtarak apo dhe jo ushtarak, duhet të kryejë detyrat e 
veta, jo sipas urdhrave të politikës, por sipas ligjit, moralit dhe zanatit 
të tij, prej ushtaraku, në këtë rast.

Bashkim Kopliku
4.5.2008

Phone: +355 52 223663
Mob: +355 0682200590
Email: <bkopliku at gmail.com>
optional: <bkopliku at infinito.it>

Please, send important e-mails
on both addresses.



__________ Information from ESET NOD32 Antivirus, version of virus signature 
database 3080 (20080506) __________

The message was checked by ESET NOD32 Antivirus.

http://www.eset.com