[AlbClub] PD-ja dhe amendamentet kushtetuese

[Bashkim Kopliku--->Gmail Home]

PD-ja dhe amendamentet kushtetuese
[Gazeta Shqiptare, 19.04.2008]

Partia që nuk ka pasur kurrë ndërrime kryeministrash, është PD-ja.  Prandaj 
është absurditet që të kërkosh motivet që po i shtyjnë berishistët të 
ndryshojnë Kushtetutën, tek stabiliteti i qeverisjes.  Shkaku i këtij 
ndryshimi është tek babëzia për pushtet absolut.

Sistemi zgjedhor që berishistët po promovojnë me skuthëri, ai proporcionali 
rajonal (PR), ka për qëllim t'i nxjerrë jashtë Kuvendit "pakicat", të gjitha 
partitë e tjera, përveç PD-së dhe PS-së (se harrova, edhe PBDNj-së).  Me 
sistemin PR, arrijnë që pragun efektiv për të pasur deputetë (përqindja 
minimale e votave të nevojshme për të pasur deputet), ta rrisin aq sa ju 
duhet për të përjashtuar të gjithë të tjerët.  Kjo është me skuthëri, sepse 
paraqitet sikur z. Berisha po e pranon në kuadrin e tolerancës ndaj 
opozitës-formalisht propozimi vjen nga opozita!

Z. Berisha është në hall të madh.  Brenda koalicionit të tij të megadushkut, 
po lindin rreziqe shumë të mëdha, për pushtetin e tij personal.  Ka dalë 
papritmas në horizont, partia e vërtetë Demokristiane (PDK), ani se 
praktikisht u krijua nga elita politikanësh në Kuvend.  Kjo parti, jo vetëm 
që po shtrihet në bazë me furi, por ka filluar të ketë dhe njohje 
ndërkombëtare, dhe pikërisht në ato vende ku mëtonte monopol berishizmi: tek 
partitë popullore evropiane, tek e djathta.  Programi i PDK është krejt i 
djathtë, pa surrogatin majtist ekstremist të programit berishist.  Me gjithë 
sulmin propagandistik denigrues të filluar në bazë nga skalionet berishiste, 
shumë të djathtë po fillojnë ta ndjekin me interes këtë parti: a thua po 
rilind e djathta evropiane në Shqipëri, pas shkatërrimit të saj total nga 
berishizmi?!

Kanë filluar edhe zëra individualë brenda PD-së, që nuk janë pa rreziqe për 
berishizmin, ani se akoma të pa organizuar në një grupim të qartë e të 
strukturuar.  Nuk e kemi fjalën vetëm për guximtarët tashmë të njohur, si 
deputetët Ngjela e Bakalli, por edhe për shumë të tjerë, që po etiketohen si 
"të presidentit Topi".

Të gjitha këto, duhet të kishin ndodhur prej kohësh, në çdo vend që ka një 
minimum synimi drejt Lirisë.  E vërtetë që është stërmbushur kupa: në PD u 
mblodhën, në kundërshtim me dëshirat e bazës, e në kundërshtim me minimumin 
e moralit, sa e sa prej atyre që vetë berishistët i kishin anatemuar për 
vite me radhë, si "hajdutë të drurit të arrës", apo si "puthadorë", apo si 
"gjeneralë të rebelimit komunist", apo dhe si "karrige-thyer"; u mblodhën 
KOP-istët (anëtarët e Komisionit të Orientimit të Politikave), ata të rinjtë 
me ide të djathta, që në naivitetin e tyre të rinisë, u shfrytëzuan për 
faciadë për të treguar se gjoja berishizmi kishte ndryshuar, e që pastaj i 
zhgënjyen kur e gjitha përfundoi në zënie ndonjë posti të pamerituar në 
administratë, apo në korrupsion galopant me tenderat shtetërorë.

Ka parti të mazhorancës, si ajo republikane (PR), që ekzistojnë thjeshtë si 
produkt megadushku (përndryshe PR nuk do të kishte në Kuvend asnjë deputet), 
e që u duhet për mbijetesë, të jenë vegla në shërbim të z. Berisha.  Ato 
parti kryejnë vetëm funksionin e makijazhit politik të berishizmit: "shihni, 
dhe në berishizmi ka debat, ka demokraci të brendshme".  Edhe liderit të 
vjetër të PR, z. Godo, i duhet të luaj role mjerane, herë me z.Berisha, e 
herë me z. Topi, presidentin.  E pamë sesi para ca ditësh e pështyu 
Kushtetutën, në favor të z. Berisha, kur propozoi që "Presidenti të zgjidhet 
edhe me shumicë të thjeshtë votash të deputetëve", çka do të thotë që t'i 
hiqet e drejta pakicës parlamentare që të shpjerë vendin në zgjedhje, duke 
përdorur moszgjedhjen dot të Presidentit të Republikës.  E pastaj, tha mos 
të preket Kushtetuta, kjo pas takimit me Presidentin.

Natyrisht që në Kushtetutën tonë, është futur qëllimisht zgjedhja e 
presidentit me një mekanizëm me disa raunde dhe me konsensus (jo "direkt nga 
populli" se bëhej shumë i fortë), si garanci anti-diktaturë-sa vinim nga një 
president diktator, ai i 1997-ës!  Ky mekanizëm është futur nga bërësit e 
vërtetë të Kushtetutës, nga miqtë tanë ndërkombëtar që na shpëtuan në 1997 
ën, e që na ftuan në NATO, në 2008-n-sa po luajmë ne shqipot, me nervat e 
tyre!  Le që ky Kuvend megadushku nuk duhet ta prekë fare Kushtetutën, 
përveç minimumit të nevojshëm për të shmangur megadushkun.
Berishizmi po punon që me ndryshimet e Kushtetutës, t'i japë kryeministrit 
fuqi që nuk i ka asnjë kryeministër në botën demokratike, dhe nga ana 
tjetër, duke e kthyer Presidentin në një kukull, apo lake të kryeministrit. 
E thënë më trashë: të rregullohet me Kushtetutë, që nëse rrëzohet z. 
Berisha, të marrë me vete të gjithë shtetin, si në vitin 1997.

Këtij rreziku të madh, është detyrë patriotike t'i kundërvihen të gjithë 
deputetët anti-diktaturë që ka në Kuvendin aktual, të çdo ane qofshin.  Ata 
duhet të organizohen në një front kundër diktaturës që po i kërcënohet 
vendit.  Duhet të votojnë që të kalojnë në referendum çdo ndryshim të 
Kushtetutës, që synon përqendrimin enverist të pushtetit, në duart e një 
kryetari partie, apo të një kryeministri.  E pra, mjaftojnë vetëm 28 
deputetë, që ndryshimi i Kushtetutës t'i kalohet votimit popullor 
(referendumit), kjo në përputhje me nenin 177 të Kushtetutës: pastaj populli 
të japë atë që dha në referendumin e vitit 1994.

Bashkim Kopliku
17.4.2008



Phone: +355 52 223663
Mob: +355 0682200590
Email: <bkopliku at gmail.com>
optional: <bkopliku at infinito.it>

Please, send important e-mails
on both addresses.



__________ Information from ESET NOD32 Antivirus, version of virus signature 
database 2942 (20080312) __________

The message was checked by ESET NOD32 Antivirus.

http://www.eset.com