[AlbClub] Fw: Ndotje radioaktive po, akustike jo

[Bashkim Kopliku--->Gmail Home]

Ndotje radioaktive po, akustike jo
[Gazeta Shqiptare, 22.02.2008]

Së fundi e dëgjuam të bisedohet edhe në Japoni, në vizitën e para disa 
ditëve të kryeministrit, për centralet bërthamore, si mundësi e ndërtimit të 
tyre në Shqipëri.  Kjo na bëri përsëri të vëmendshëm për rreziqet që mund të 
na kanosen.  Jemi një shoqëri me një kulturë (mendësi) të veçantë: bëjmë 
sikur shqetësohemi për ndotjen akustike (zhurmat), dhe nuk çajmë fare kokën 
për ndotjen radioaktive.  Shoqëria jonë duhet të tregojë së pari një reagim 
minimal ndaj rreziqeve të radioaktivitetit, e pastaj të diskutojë ndërtimin 
e centraleve në vendin tonë.

Inxhinier Edgar Frashëri, një profesionist i shquar, por edhe një patriot me 
sens të theksuar qytetar, ka hedhur në publik disa herë, edhe me shkrime në 
shtyp, rrezikun që mund t'i kanoset jetës sonë, nga përdorimi i hekurit të 
infektuar me radioaktivitet të importuar nga Ukraina apo Bjellorusia, si 
pasojë e eksplozionit në Çernobil, të centralit bërthamor që eksplodoi disa 
vjet përpara (26 prill 1986).  Këto vitet e fundit, me këtë hekur qenkan 
ndërtuar disa banesa në Shqipëri.  Inxhinieri ka rënë në kontakt me këtë 
fakt, gjatë punës së tij si projektues dhe si ndërtues, por edhe duke 
ndjekur shtypin duke qenë përzgjedhës ndaj problemeve të profesionit të vet: 
diku nga viti 2000, aparati i matjes së radiacionit, paska treguar 
disafishin e normës së lejuar të radiacionit, në një shkollë të ndërtuar me 
atë hekur të infektuar.

Inxhinier Frashëri e dha alarmin e tij, edhe në vitin 2006, dhe edhe në 
janar të vitit 2008, por deri tani nuk dihet të ketë reaguar ndonjë instancë 
shtetërore, së paku për verifikimet përkatëse për të vlerësuar masën e 
rrezikut.  E keqja, dhe më e madhe, është se nuk dihet të ketë pasur as edhe 
ndonjë jehonë mediatike, që të këmbëngulet për këtë verifikim, çka akuzon 
edhe shoqërinë tonë.

Sipas inxhinierit, ky hekur mund të jetë më i dëmshëm për shëndetin, sesa 
shumë ndotës të tjerë të ambientit.  E pra shohim se flitet në media për 
zhurmat e trafikut, bile dhe pozojnë në ekranet tona njerëz me aparate që 
masin zërin me "decibel", me ca njësi që habisin telespektatorin, por nuk 
dëgjojmë gjë se janë bërë matje radiacioni, apo investigime të tjera, për 
radiacionin e ndërtesave tona, atyre me atë "hekurin radioaktiv".  Pra, nuk 
shohim asnjë preokupim nga nëpunësit e mbrojtjes së ambientit, me ministrin 
Xhuveli në krye.  Nuk ka luajtur vendi njeri, që të thotë: u verifikua, dhe 
rrezatimi është i parrezikshëm.  Ose, rrezatimi është në nivele të 
palejueshme, dhe shteti vendos prishjen e ndërtesës.

Nuk është vetëm një ministri që nuk çan kokën, por është edhe një shoqëri e 
tërë që nuk e çan kokën.  Kjo shoqëri bombardohet me një mori lajmesh të 
vërteta apo të pavërteta, dhe është e trullosur, dhe pa aftësi reaguese.

Kaq mjafton për të përfunduar se shoqëria jonë është krejt e paaftë, krejt e 
papërgatitur të përballojë sfida të rënda, siç është ndërtimi i një centrali 
bërthamor.  Shoqëri të tjera, me qindra herë më të zhvilluara se jona, si 
p.sh. ajo italiane, kanë qenë të vetëdijshme se nuk e përballojnë dot 
rrezikun që paraqet ndërtimi i centraleve bërthamore, dhe kanë vendosur që 
mos ta lejojnë ndërtimin e tyre në vendin e vet-ne mos jemi çmendur fare?!

Elita jonë intelektuale, duhet të ketë sensin praktik qytetar.  Të vihet në 
krye të një kundërshtimi qytetar, që të ndalojë qeverisjen që të hyjë në 
aventura në të cilat duhet një mbikëqyrje shtetërore e nivelit më të lartë 
të mendueshëm: centralet bërthamore.  Pavarësisht se ato centrale do t'u 
ndërtuakan nga firma shumë të specializuara, qofshin japoneze apo të tjera, 
sido qoftë, do të ndërtohen në tokën shqiptare, të qeverisur nga shqiptarët, 
nga njerëz që kanë kulturën qytetare aktuale, me të gjitha mangësitë e saja.

Natyrisht që një firmë që vjen të ndërtojë centrale bërthamore në Shqipëri, 
ka para të korruptojë sa e sa nëpunës shqiptarë, që të mbyllin sytë para sa 
e sa gafave teknike, shumë më komplekse, si ato të lidhura me centralet 
bërthamore-masmedia botërore është mbushur me akuza ndaj firmave me shumë 
emër të mirë në botë, që janë përzier në skandale korrupsioni marramendës, 
me qeveritarë të korruptuar, sepse ndryshe dhe nuk e çanin dot në ato 
shtete.  Këtu tek ne, rastet do të jenë skandaloze, derisa nuk po lëviz 
njeri për të verifikuar një radiacion të hekurit të betonit, e mbase vetëm e 
vetëm sepse një tregtar hekuri ka paguar ndonjë ryshfet që instanca 
përkatëse shtetërore të mos lëvizë vendi, të bëjë të paditurin.

Ndërtimi i centralit bërthamor mund të guxojë të përmendet tek ne, vetëm kur 
të kemi dhënë shenja se po ndryshojmë.  Natyrisht, që duhen marrë edhe masat 
institucionale, ku ndër të parat janë futja në ligjet tona e neneve që 
detyrojnë transparencën qeveritare dhe të privatëve, kur është fjala për 
rreziqe ekologjike; penalitete kundër personave që nuk marrin masa për 
parandalimin e dëmtimeve ekologjike; parashikimi i veprave penale me dënimet 
përkatëse për personat që i fshehin popullsisë pasojat e mundshme 
ekologjike; ndalimi i klasifikimit sekret, i të dhënave që lidhen me 
ekologjinë etj.  Vetëm pasi të kemi së paku ligjet e përgjithshme mbi 
ekologjinë, vetëm pasi të kemi filluar t'i zbatojmë mbi gjëra të thjeshta, 
atëherë mund të fillohet të mendohet për aventura bërthamore, për ligje 
specifike për to.

A kemi arritur të sensibilizojmë me këtë shkrim?!  Kjo do të kuptohet nga 
sesi do të reagojë shteti dhe shoqëria, ndaj verifikimit të ndotjes 
radioaktive të mundshme, nga hekuri ukrainas apo bjellorus.

Bashkim Kopliku
20.2.2008


Phone: +355 52 23663
Mob: +355 0682200590
Email: <bkopliku at gmail.com>
optional: <bkopliku at infinito.it>

Please, send important e-mails
on both addresses.



__________ Information from ESET NOD32 Antivirus, version of virus signature 
database 2894 (20080221) __________

The message was checked by ESET NOD32 Antivirus.

http://www.eset.com