[AlbClub] Fw: Ata të Kalimashit në fik, kurse të Hasit në burg

[Bashkim Kopliku--->Gmail Home]

Ata të Kalimashit në fik, kurse të Hasit në burg
[Gazeta Shqiptare, 17.1.2008]

Tek shihnim në televizion sesi kryeministri shpërdoronte tunelet gjigante të 
Kalimashit si dhe patriotizmin, për të mbrojtur veten dhe ministrin e tij 
nga akuza për korrupsion, bënim një lidhje me një akuzë tjetër për 
korrupsion, me atë kundër ish-deputetit të Durrësit, Ilirjan Berzani, 
ish-drejtorit të përgjithshëm të rrugëve.  Prapë padrejtësi: ndërsa akuza e 
korrupsionit me Kalimashin, përballohet në fik (në poste ministri e 
kryeministri), ajo tjetra, akuza me Hasin (tenderi për rrugën 
Has-Qafëprush), i ka shpënë në burg të akuzuarit. Shqipërisë i duhet të bëjë 
"reformën" e parë jo në drejtësi, por në mentalitet (mendësi), duke pranuar 
se para ligjit duhet të jetë njësoj, si kryeministri, si ministri, si dhe 
ish-deputeti, apo dhe një punëtor i thjeshtë.  Por, shoqëria shqiptare duhet 
të kërkojë llogari edhe më të veçantë për trajtimin e një ish-deputeti të 
saj, që ka muaj që dergjet në burg.  Një deputet është pjesë e elitës 
politike të çdo vendi.  Ruajtja e lirisë dhe e pastërtisë së ambientit 
politik, aq të domosdoshme për të gjithë, sigurohen vetëm duke pasur një 
elitë politike të fortë, të guximshme dhe të ndershme.  Nëse ne shqiptarët 
nuk do të mbrojmë të drejtat e njerëzve që bëjnë pjesë në këtë elitë, 
sidomos kur nuk kanë më pushtet, janë thjeshtë ish-ë, kemi lënë të na e 
prishin këtë institucion virtual aq të rëndësishëm për çdo komb, kemi dhënë 
mesazhin e rrezikshëm: politikanë, servilosuni, vidhni e abuzoni sa të jeni 
në pushet, se pasi ta lini pushtetin, nuk ua var më njeri.

Gjatë vizitës në tunelet e Kalimashit, Kryeministri shpërdoroi patriotizmin, 
dashurinë për Kosovën, për t'u mbrojtur ndaj akuzave që i bëhen për 
korrupsion me rrugën Rrëshen-Kalimash etj.  Nuk ka asnjë shqiptar që të jetë 
kundra kësaj rruge, rrugës me Kosovën, e kjo gjë dihet, sado që kryeministri 
përsërit të kundërtën.  Ajo që shqetëson shumë shqiptarë, është se mos është 
vjedhur në realizimin e kësaj rruge.  Ne personalisht mendojmë se nuk ka 
vjedhje në këtë rrugë, as nga kryeministri, dhe as nga ministri i jashtëm. 
Ky është mendimi ynë.  Por ama nuk kalojmë në ekstrem, që t'i quajmë 
anti-shqiptarë ata që kanë mendim të ndryshëm, të gjithë ata që dyshojnë se 
mos ata të dy kanë vjedhur.

Të njëjtën logjikë kemi dhe në rastin e ngjashëm, por me përmasa shumë herë 
më të vogla, të rrugës së Hasit.  Ne mendojmë se Berzani është i pafajshëm. 
Por në ndryshim me kryeministrin, ne nuk i quajmë anti-shqiptarë, ata që 
mendojnë se Berzani është i fajshëm  Ne thjeshtë kërkojmë trajtim të tij 
njësoj me "të tjerët".

Bile normalisht duhet të trajtohej më lehtë rasti i Hasit, sesa ai i 
Kalimashit.  Kjo sepse ndërsa me Kalimashin lidhet një investim prej "qindra 
milionë eurosh" që po zbatohet, kurse me atë të Hasit lidhesh një investim 
shumë më i vogël, prej vetëm 5 milionë dollarësh, dhe bile i anuluar.  Pra, 
në rastin e Hasit nuk ka dëm efektiv, e me gjithë atë dergjet në burg 
ish-deputeti Ilirjan Berzani dhe të tjerë.

Po përmendim me emër vetëm Berzanin, sepse e njohim personalisht për njeri 
të ndershëm, gjë që na bën të mendojmë se nuk po gabojmë.  Natyrisht që nuk 
mjafton vetëm kaq.

Jemi të prirë ta quajmë të pafajshëm ish-deputetin Berzani, jo vetëm nga 
njohja personale me të, por edhe nga fakti që njohim mirë kryeministrin 
aktual, që ka një biografi shumë të errët të ndërhyrjes në pushtetin 
gjyqësor, natyrisht në kundërshtim me të gjitha parimet e pranuara botërisht 
të ndarjes së pushtetit, të demokracisë.

Kemi edhe një argument tjetër kundër mundësisë së korrupsionit të 
ish-deputetit Berzani: ai kishte vetëm 5 muaj në punë shteti, pra nuk pati 
kohë kur të korruptohet.  Dakord, edhe për këtë "nuk është e thënë ...", por 
ama është një argument.

Gjithsesi, ish-deputeti Berzani është akuzuar, por nuk është provuar se 
është i fajshëm, sepse nuk është zhvilluar akoma së paku një proces gjyqësor 
i plotë.  Në këto kushte, çdo njeri mund ta quaj atë të pafajshëm, dakord, 
ose dhe të fajshëm.

Dyshojmë se me ish-deputetin Berzani, nuk është punë korrupsioni.  Thjeshtë 
dikujt i duhet "koka e tij në sini" (po perifrazojmë ca fjalë të thëna në 
Kuvendin tonë para ca kohësh, nga një ministër i sotëm, kundër kryeministrit 
të sotëm, atëherë presidenti i vendit).  Mbase i duhet "koka e Berzanit", si 
kryeministrit, si kryetares së Kuvendit, si dhe shumë të tjerëve.  Mbase u 
duhet të gënjejnë botën se ja, po e luftojnë korrupsionin, prandaj të na 
pranojnë në NATO, që me atë rast të mbajnë dhe ata vetë pushtetin e tyre.

Fatkeqësisht, sot ish-deputetin Berzani nuk e ndihmoi sa duhet as mbrojtja 
dinjitoze e kryetarit të partisë së tij, Nard Ndoka, kështu që po dergjet 
prej katër muajsh në burg, pa pasur mundësi reale të mbrojë pafajësinë e 
tij, e pa pasur mundësi për të provuar edhe motivet e goditjes që iu bë.  E 
kjo është padrejtësi, edhe relativisht (krahasuar me qëndrimin ndaj të 
akuzuarve për Kalimashin), por edhe absolutisht, krahasuar me ligjet 
demokratike.

Në vijim do të japim ca hipoteza që na i kanë thënë, bile dhe me emra e me 
mbiemra të aktorëve konkretë të kësaj farse dhe korrupsioni të politikës 
shqiptare.  Për etikë gazetareske, ne nuk do t'i përmendim emrat.  Por 
prokuroria, nëse do t'i dijë emrat, mjafton të pyesë të akuzuarit që ka në 
burg, dhe ata do t'ia japin.

Akuzohet se një "firmë sponsorizuese" e fushatës zgjedhore të një politikani 
lokal, është financuesja e zyrtarëve të shtetit që kanë realizuar sulmin 
kundër Berzanit.  Politikani lokal megjithëse rezultuaka të jetë humbës, 
prapë se papë paskësh mbetur në tavë (në njëfarë pushteti), që të bëjë Monin 
(ndërmjetësin), për ata që janë në qendër.  "Firma sponsorizuese" paska 
pasur interesa ta hiqte qafe "drejtorin e rrugëve" Berzanin, sepse nuk po e 
blinte dot, që të fitonte tendera rrugësh siç ishte mësuar: në shkelje të 
ligjit.  Ndërkohë, tani që Berzani është në burg, tenderat që i duhen i 
paskësh fituar, e do t'i fituaka sa të ketë njerëzit e vet aty ku duhet!

Sidoqoftë, ka një fakt që është lehtë i verifikueshëm: deri sot nuk paskësh 
vajtur asnjeri ta marrë në pyetje ish-deputetin Berzani, që kur është 
burgosur.  Thuhet se nuk dinë të shkretët hetues se përse ta pyesin, meqë 
nuk ka asnjë faj nga ish-deputeti, por ka faj nga ata që po e bëjnë kurban 
pa faj.

Por atë që u skuqet faqja ta bëjnë hetuesit, t'i bien në qafë një të 
pafajshmi, nuk u bëka syri tërt ta bëjnë njerëzit e veshur me uniformë, të 
katapultuar nga paradhomat e kryeministrit aktual.  Ata paskan marrë detyrë 
të zbatojnë skenarin e bërjes fajtor, të një të pafajshmi, dhe për këtë po 
punuakan dhe brenda burgut.

Gjithsesi, mundësia që të jenë të vërteta këto hipoteza-akuza, mendojmë se 
nuk është më e vogël sesa ajo e akuzave publike të kryeministrit.  Bile ne 
po i bëjmë si hipoteza (si mundësi), e jo duke qenë kategorikë (të prerë e 
të sigurt) si kryeministri ynë, kur sot thotë "Berzani është i korruptuar", 
apo se "ministri i tij, Bashaj është qelibar", siç thoshte dikur se ministri 
i tij i sotëm "Genc Ruli është hajduti i drurit të arrës" etj. etj.  Në këtë 
situatë llafesh, ajo që do ta ndante deri diku, të vërtetën nga gënjeshtra, 
është një proces gjyqësor i cili duhet të bëhet sa më parë.  Themi "deri 
diku", sepse është shumë e vështirë të kemi një proces gjyqësor të drejtë 
dhe transparent, në Shqipërinë aktuale.

Që t'i jepet fund këtij pisllëku, ish-deputeti Berzani duhet të nxirret 
jashtë burgu, të shkojë pranë familjes së tij, dhe procesi penal ndaj tij të 
vazhdojë siç po vazhdon ai i Kalimashit-natyrisht, kur themi Berzani, 
nënkuptojmë edhe "ata me të".  T'i jepet edhe ish-deputetit mundësia të 
mbrohet normalisht, jo vetëm në ambientin e drejtësisë sonë tejet të 
korruptuar materialisht dhe të korruptuar edhe politikisht, duke zbatuar 
urdhrat e qeveritarëve të radhës.  T'i jepet edhe Berzanit mundësia të 
mbrohet edhe në ambientin e opinionit publik, gjë që duhet të kompensojë 
disi, këtë drejtësinë tonë.  Opinioni shoqëror duhet të ngrihet në mbrojtje 
të të drejtave të ish-deputetit Berzani, pa u strukur në rehatinë meskine të 
mos kritikës së pushtetit, se nesër padrejtësia mund të godasë secilin.


Bashkim Kopliku
15.1.2008
Phone: +355 52 23663
Mob: +355 0682200590
Email: <bkopliku at gmail.com>
optional: <bkopliku at infinito.it>

Please, send important e-mails
on both addresses.